Среќен брак

Блажо и Наташа низ цела Македонија беа познати по тоа што беа многу години во брак и никогаш се немаа скарано помеѓу себе.
Дојде денот за славење на 50 годишнината од нивниот брак. Екипа од националната телевизија разбра дека тие се брачен пар без ниту една кавга во бракот, и затоа сакаа да снимат прилог со нив, за да ги покажат како позитивен пример за останатите. Кога пристигна телевизиската екипа за да направи интервју со овој среќен пар го начека Блажо како ужива и си пие ракиичка во дворот.
Новинарот веднаш го праша Блажо, заради која причина толку многу години никогаш се немаат скарано и имаат убав брак со неговата жена. Тој веднаш удри со чашата ракија од масата и почна да зборува:
– Сѐ почна кога се венчавме. – почна да раскажува Блажо. Наташа и јас веднаш заминавме на меден месец во Италија. Таму сѐ беше одлично, беспрекорна организација и многу нѐ шетаа. Третиот ден нѐ однесоа на една многу елитна фарма за одгледување на коњи и организираа и ние да јаваме коњи. Мојот коњ беше премирен. Преубаво беше, само си јавав и свиркав. Арно, ама коњот од жена ми беше многу лош. Само што почна да го јава, се исправи на задните нозе и ја фрли на земја. Леташе околу 3 метри. Жена ми само мирно стана, се истресе од прашината, го погали коњот и нежно му рече:

– Ова ти е прв пат!

– Продолживме да јаваме, отидовме 100 метри понатаму, нејзиниот коњ повторно се исплаши од нешто и пак ја фрли. Таа мирно пак си стана. Се виде на колениците дека е цела со модрици, а имаше и на телото. Пак го погали коњот и му рече: „Ова ти е втор пат“.

– Сепак продолживме да јаваме. Но верувале или не, за неполна минута коњот пак ја фрли. Сега, таа само стана од земјата, ништо не зборна. Кој знае од каде, извади пиштол и без да каже збор, го испука коњот меѓу очите.
Јас веднаш почнав да викам: Што направи кучко една! Дали си нормална? Што ти направи толку лошо ова коњче? Што ќе правиме сега? Ние ќе треба да го платиме…

А, жена ми мирно, само се сврте кон мене и нежно ми рече:

– Блажо, ова ти е прв пат…