Почнаа традиционалните илинденски коњички маршови: Од цела Македонија се јава кон славното Крушево
Секој јули, македонските планини и градови отекнуваат од звукот на копитата, зурлите и тапаните. И оваа година, повеќе коњички маршови од различни краишта на земјата тргнуваат на пат кон славното Крушево и Мечкин Камен, за да им оддадат почит на илинденците и да ги зачуваат македонската традиција и историскиот завет.
🐎 Од Скопје и Општина Аеродром кон илинденските патеки
Од Скопје традиционално се испраќаат учесниците на Илинденскиот коњички марш, кои ја продолжуваат децениската традиција во чест на најголемиот македонски празник Илинден. Меѓу учесниците на 48. традиционален Илинденски коњички марш има и пет девојки. Тие на 31 јули ќе се спојат со учесниците од Свети Николе, Кичево и Битола. За Крушево втора година по ред тргна и коњаница од Кочани.
🎺 Походот од Битола: Преку историските села до Крушево
Битола е почетна точка за патување кое одамна ги надмина границите на обично дефиле. Битолската коњаница го започнува својот поход кон Крушево, носејќи ги со себе историјата, традицијата и споменот на македонското минато. Во рамките на оваа традиција Битолската коњаница „Галоп“ и Уникат бенд, годинава на 2-ри Август во склоп на манифестацијата „Десет дена Крушевска Република“ ќе имаат видео промоција на патриотски песни.
🏔️ Од Бигорскиот манастир, преку Јанче и Галичник
Заедничкиот илинденски поход го минуваат и коњаниците кои тргнуваат од Бигорскиот манастир. По Светата литургија и свечената заклетва, тие се движат низ живописните планински предели, а крајната дестинација е Мечкин Камен.
Во рамките на илинденската коњаница обединети се патриоти од различни краишта на Македонија. Различни се местата од кои доаѓаат, но една е љубовта кон татковината, една е почитта кон Илинден и еден е заветот – жртвата на предците никогаш да не биде заборавена.
🇲🇰 Сите патишта водат кон Мечкин Камен
Коњаниците од сите страни на Македонија се спојуваат во Крушево за да им се поклонат на хероите. Додека коњите чекорат по македонските патишта и планини, со секој нивен чекор одекнува еден единствен глас:
За кого? – За Македонија!
Бог нека го благослови македонскиот народ и сите други македонски граѓани кои живеат во убавата МАКЕДОНИЈА!
