Ексклузивна репортажа од Расил Хаџар: Чудото крај турскиот град Сиирт каде се спојуваат праисторијата, романтиката и адреналинот

Ако патувате во југоисточна Турција, во близина на границата со Сирија, ќе го најдете историскиот град Сиирт. Нашата екипа го посети овој град во кој денес живеат повеќе од 160.000 луѓе, претежно Курди и Ви подготви репортажа за едно од местата кои се блиску до Сиирт и едноставно не смеете да не ги посетите. На само четири километри југоисточно од центарот на градот, природата создала ремек-дело кое ги спојува адреналинот, суровата убавина на карпите и вековната историја – импресивното карпесто плато Расил Хаџар (Rasıl Hacar), во народот познато и како Деликли Таш (Delikli Taş / Камената преграда).

Сместено во прекрасната долина Ботан, ова место не е само обична туристичка точка. Тоа е визуелен спектакл на 350 метри надморска височина над реката Ботан (Улучај), кој привлекува се повеќе домашни и странски туристи, вљубеници во природата, но и фотографи.

Кањонот Ботан на дланка од ридот Расил Хаџар

Самиот рид Расил Хаџар нуди фасцинантен поглед од птичја перспектива кон кривулестиот тек на реката Ботан. Симболот на овој рид е токму карактеристичната перфорирана (дупната) карпа која гордо се издига над бездната и по која целата област го добила името „Деликли Таш“.

Погледот кон реката и околните планински масиви е особено магичен во моментите кога сонцето заоѓа, боејќи ги карпите во топли, златни нијанси. Оваа драматична заднина веќе со години има статус на култна локација за професионална фотографија. Ова е главното место каде што младенците од целиот регион доаѓаат за да ги направат своите свадбени фотосесии, создавајќи контраст помеѓу нежноста на белиот фустан и суровоста на античките карпи.

Тајните на праисториската пештера Ташбаши (Taşbaşı Cave)

Веднаш до познатата карпа Деликли Таш се наоѓа уште еден фасцинантен локалитет – пештерата Ташбаши. Оваа пештера е природен феномен, формиран со вековна ерозија на варовничките карпи уште од праисториските времиња.

Археолошките наоди откриваат дека пештерата била користена како засолниште во антиката, а на нејзините внатрешни ѕидови сè уште се видливи траги од рачно изработени алатки со кои луѓето го обликувале просторот. Пештерата се состои од два дела поврзани со мал централен отвор кој служи како премин. За среќа на туристите, влезот во оваа историска ризница е целосно бесплатен, што ја прави уште поатрактивна за истражување.

„Карпата на скокањето“ – Тест за храброст на локалните момци

До пештерата се наоѓа уште една голема, вертикална карпеста формација која кај локалното население е позната како „Јампинг рок“ (Jumping Rock / Карпата на скокањето).

Името на оваа карпа доаѓа од една необична локална традиција и симболика: младите момци од Сиирт со децении наназад скокале помеѓу двете соседни карпи над бездната за да ја докажат својата храброст пред врсниците. Денес, оваа карпа е важен дел од културниот пејзаж на регионот и претставува вистинска геоморфолошка атракција која на целото место му додава доза на мистичност и адреналин.

Рај за културен и природен туризам

Денес, просторот околу Расил Хаџар е уреден со места за одмор, безбедни патеки и тераси-видиковци, овозможувајќи им на посетителите безбедно да уживаат во погледот. Со комбинацијата од праисториската историја на пештерата Ташбаши, адреналинските приказни за карпите и неверојатниот пејзаж, ова место се позиционира како една од најважните дестинации за културен и еколошки туризам во овој дел од Турција.

Ако сакате да го искусите автентичниот дух на Истокот, каде недопрената природа раскажува вековни приказни, Расил Хаџар е дестинација која задолжително мора да ја посетите.