„Д Бест оф Битола“ незаборавна музичка вечер во градот под Пелистер

Битола синоќа уште еднаш докажа зошто важи за градот со најкарактеристичен урбан дух и неповторлива публика. Во преубавиот амбиент на Пациото на НУ Завод и Музеј Битола, се одржа долгоочекуваниот настан „Д Бест оф Битола“, кој ги спои емоциите, традицијата и модерната енергија под една заедничка идеја: Битола за Битола.

Присутните уживаа во музичкото патување низ различни музички стилови, каде што современата сцена совршено се спои со моќниот звук на Оркестар DIVA.

Рокенрол историја и нови оркестарски аранжмани кои ја кренаа публиката на нозе

Локалните легенди и добро познатите имиња покажаа како звучат култните рефрени во едно сосема ново, симфониско руво:

• Четири децении рок лекција со „Чоканче“: Легендарниот бенд, кој од 1983 година е симбол на битолскиот бунт, искреност и карактер, синоќа испиша нова историја. Нивните безвременски химни како „Буништар“, „Чоканче“, „Нема време за нас“ звучеа преубаво во моќното оркестарско издание, предизвикувајќи вистинска еуфорија во публиката.
• Битолски магнетизам и чиста позитивна енергија: На сцената брилијантни настапи имаа и секогаш енергичните Паркети, секогаш разиграните Brass Brothers, како и составите Гром и харизматичниот Бранислав Николов од Фолтин, кои со својот препознатлив шарм ја држеа атмосферата на највисоко ниво.

• Одличен настап на „CODE369“: Составот кој ја продолжува приказната на некогашните „Памперси“ донесе светска атмосфера. Препознатливиот вокал на Ирена Димовска, овојпат поддржан од целиот бенд и Оркестар DIVA, им даде нова, уште поголема димензија на нивните авторски песни.

Битолска премиера за воодушевување: Моќната „Industrial Symphony“

Посебен и несекојдневен момент на вечерта беше изведбата на „Industrial Symphony“ – новиот и смел проект на Оркестар DIVA, кој по скопската премиера, синоќа за првпат го слушна и битолската публика. Со својот модерен концепт и поинаков, авангарден пристап кон симфонискиот звук, оваа изведба беше вистинско изненадување кое долго ќе се прераскажува.

„Ова е вистинското лице на Битола! Спојот на култното и модерното, спакувано со оркестарски звук во ваков историски амбиент, е нешто што само овој град знае да го доживее и награди со ваква искрена енергија“, коментираа присутните по концертот. „Д Бест оф Битола“ се покажа како полн погодок и проект кој дефинитивно остава силен печат во културното лето на градот.